نیوزڈیسک | جکارتہ
ایشین گیمز میں پاکستانی کھلاڑی قوم کا سر فخر سے بلند کرنے کی روایت برقرار رکھے ہوئے نظر آرہے ہیں. ارشد ندیم نے جیولن تھرو میں کانسی کا تمغہ جیت کر پاکستان کے لیے تیسرا میڈل حاصل کرلیا۔اطلاعات کے مطابق ارشد ندیم نے یہ کارنامہ 80.75 میٹر تھرو لگاکر انجام دیا۔ انہوں نے مجموعی طور پر 6 کوششیں کی جن میں 73.52، 76.73، 72.20، 80.75، 77.56 اور 72.20 میٹر کی تھرو پھینکیں،ٹورنامنٹ میں پاکستان کے مجموعی میڈلز کی تعداد 3 ہوگئی ہے جو کہ تمام کانسی کے تمغے ہیں،کیٹیگری میں بھارت کے نیرج چوپڑا نے طلائی جبکہ چین کے کزہن لیو نے چاندی کا تمغہ حاصل کیا۔
ارشد ندیم کی اس کامیابی پر پاکستان ایتھلیٹکس فیڈریشن کے صدر اکرم ساہی کی جانب سے ارشد ندیم کیلئے ایک لاکھ روپے انعام کا اعلان کیا گیا ہے جب کہ ان کے کوچ کو 50 ہزار روپے دیے جائیں گے۔ایشین گیمز میں پاکستانی کھلاڑی اپنی بھرپور محنت، لگن اور طاقت کا مظاہرہ کرتے ہوئے قوم کا نام روشن کرنے میں مگن نظر آرہے ہیں.
